DAVAO CITY – Masaligon si Davao City Jail Chief Warden Grace Taculin nga ang katukuran sa walo ka ektaryas nga jail facility sa Barangay Wangan, Calinan District, makasulbad kaguot sa Davao City Jail sa Maa, ning dakbayan sa Davao.
Kung mahuman na ang nahisgutan nga pasilidad ibalhin didto ang uban nga mga binilanggo, samtang ang mga masaliton ug high-risk prisoners ibilin sa city jail annex.
Una nang nasayran nga ang mga binilanggo sa Davao City Jail mi-sobra na kapasidad sa bilanggo-an 300 lamang ngadto sa 1,006 ka porsiento uban sa kasamtangan nga ihap nga 3,097 nga misangpot ngadto sa sobrang pagdasok sa mga binilanggo.
Sumala pa kang Davao City Jail Chief Warden taculin nga kadaghanan sa mga nadetene sa nahisgutan nga bilanggo-an mga illegal drug offenders nga anaa sa 70 porsieto o mga 2,321.
Ang dakung ihap sa mga illegal drug offenders resulta sa padayon nga paningkamot sa mga law enforcers ubos sa kamando-an ni Presidente Rodrigo Duterte kalabot sa serious crackdown batok illegal nga druga.
Gipatuman nila ang ilang decongestion programs alakip na ang pagpakusog sa kanhi langan nga judicial process sa mga kaso sa mga binilanggo ug pag-ila niadtong nasobrahan na sa mga tuig ang pagkabilanggo ug pabilin pa gihapon nga nag-antus sulod sa bilanggo-an bisan pa kung nakompleto na ang ilang sentensya.
Kung makita nila ang usa ka binilanggo nga angayan na nga buhi-an, mosulat gilayon sila ngadto sa Huwis aron sa pagproseso sa mga dokumento, ug nakita nila nga nakatabang kini sa pagpaluag sa bilanggo-an.
