DAVAO CITY – Plano sa Department of Tourism Region XI nga i-market ang cultural tourism karung tuiga partikular na sa kasaulogan sa Kadayawan sa Davao.
Matud pa kang DOT-XI Regional Director Robbie Alabado nga gisubay na sa lokal nga panggamhanan ang mga nagkadaiyang sites sa siyudad nga ikonsidera nga cultural villages.
Pipila sa mga sites mao ang yutang kabilin sa Matigsalogs, laing lugar sa Carmen Calinan, Sicao nga sakop gihapon sa Calinan ingon man ang Sibulan.
Dugang ni Alabado nga ang mga turista mamahimong magpabilin sa nahisgutang mga dapit isip observers diin mamahimo sab sila nga mokaon kauban ang mga residente sa lugar ug makasuroy sa komunidad.
Sa kasamtangan aduna sumala pay mga lugar sa rehiyon nga giilang cultural village sa Tibolo, Santa Cruz, Davao del Sur diin ang mga nanimuyo mao ang mga Bagobo Tagabawa.
Gikanayong ang cultural village pundohan sa Tourism Infrastructure and Enterprise Zone Authority (TIEZA) sa DOT nga usa sa mga inisyatibo sa lokal nga panggamhanan.
Gitataw sab sa cultural tourism nga mamahimong masinatian sa mga turista ang kinabuhi sa mga lumad sa nahisgutan nga dapit.
Nasayran nga gihimo na sab ang maong lakang sa mga nasud latas sa Asya, Africa ug Latin America.
