DAVAO CITY – Patay ang wala pa mailang armado nga gikatuohang sakop sa Bandidong Abu Sayyaf nga nakigpinosilay sa kapolisan kagahapon sa kaadlawon.
Ang napatay mao ang sakay sa usa ka motorsiklo nga gigukod sa kapolisan human nga milikay sa presensya sa mga police nga nagpatrolya sa Diversion road, Bangkal ning dakbyan sa Davao kaganinang alas 2:30 sa kaadlawon.
Naka-ikyas hinoon ang sakyanan nga usa ka kolor grey nga Toyota Hi-lux.
Sumala pa kang Police Supt. Jade Clamor, sa intel division sa Davao City Police Office nga ang napatay nga suspek angkas sa motor apan mi-ambak ug nakigpinosilay sa kapolisan.
Dugang pa ni Clamor nga wala’y mga dokumento ug ID ang napatay nga alalaki, apan na-recover gikan kaniya ang usa ka bag nga dunay kagamitan sa paggama ug bomba.
