DAVAO CITY – Nagtinguha si Pangulong Rodrigo Duterte nga magbaton ang Philippine Navy ug susamang mga warship sa nasod China nga midunggo sa Sasa Port, Sasa, Davao City sukad pa sa milabay nga Dominggo sa hapon.
Kagahapon gisusi ni Pangulong Duterte pasado alas 3:00 kagahapon sa hapon ang Chinese People’s Liberation Army Navy (PLAN) Flagship-Destroyer Changchun.
Sumala pa kang Duterte nga daw susama sa usaka five star hotel ang nahisgutan nga barko ug daw dili katuohan nga usa kini ka warship.
Posibli karong ala 1:00 sa hapon mobiya na ug mobalik na sa kadagatan sa East China Sea ang tulo ka mga warship sa China nga gilakipan sa Guided missile destroyer Chang chun (DDG150), guided missile frigate Jin Zhou (FFG532) ug ang type 903 replenishment ship Chao Hu (890).
Mipahigayon ug goodwill visit ang Chinese warships pinangunahan ni Rear Admiral Shen Hao, Deputy Commander sa East Sea Fleet sa People’s Liberation Army (PLA) Navy ug kasamtangan sab nga Commander sa Chief sa PLA Navy Task Group 150.
Kagahapon gipahigayon ang seremonya pinaagi sa pagsaka ni Pangulong Duterte sa PLAN Flagship-Destroyer Changchun nga gilakipan sa arrival sa flight deck, pagkanta sa national anthem, ug inspection of Honor Guards.
Human niini ang tour ug inspection nga gipahigayon sa conference room diin dunay hamubo nga introduction sa PLAN Task Group pinaagi kang Admiral Miao.
Sa Foredeck gi-presenta sa Chinese Navy ang ilang main gun ug missiles alang sa photo opportunities. Samtang sa Commanding room flagship-destroyer hugtanon nga gidid-an ang mga sakop sa media.
Gibisita sab ni Pangulong Duterte ang bridge ug ang torpedo storage area.
Gipahigayon sab ang guest book signing nga gi-sundan sa inspection of honor guards ug ang hingpit nga pagkanaug ni Pangulong Duterte gikan sa nahisgutan nga warship sa nasod China.
