DAVAO CITY – Naduso na sa City Prosecutors Office ang kaso batok sa usa ka personal driver sa Zamboanga del Sur board member nga nasikop sa checkpoint sa Sirawan, Toril gumikan sa illegal nga paghupot ug armas.
Kasong kalapasan sa Republic Act 10591, o Comprehensive Firearms and Ammunition Regulation Act ang giduso batok kang Louie Mantos Taping, 24, residente sa Purok Bagong Lipunan, Marcos Village, San Pablo, Zamboanga del Sur.
Subay sa report gikan sa Task Force Davao, gi-endorso nila si Taping sa Toril Police Station gumikan kay nakuhaan nila kini ug armas nga walay igong dokumento.
Narekober ang armas ilalom sa lingkuranan sa driver diin kauban niini sa sakyanan si Zamboanga del Sur Belman Belotindos Mantos, 48, ug uban pang miyembro sa iyang pamilya diin moadto kini sa dakbayan aron nga motambong sa usa ka conference.
Balhug pa karon sa Toril Police Precinct si Taping samtang resolba pa ang kaso nga iyang gi-atubang.
