DAVAO CITY – Daw wala gayud mobati ug kalisang ang mga drug personalities, diin lain pang usa ang nag-atubang ug kaso human nga namatud-an nga naghupot ug illegal nga druga sa gipahigayon nga drug bust sa Boulevard, ning dakbayan sa Davao.
Una ang naila ang gipasaka-an ug kaso nga kalapasan sa Comprehensive Dangerous Drugs Act of 2002, nga usa ka Ariel Cantila Jamito, residente sa Barangay 23-C Boulevard, ning dakbayan sa Davao.
Sa usa ka resolution, si prosecutor Panfilo Junior Lovitos nakakaplag ug igo nga rason aron nga kasohan ug taralon ang dinakpan base sa kiha nga giduso ni Police Officer 1 Philip Carl Luayon, sa Sta. Ana Police Station.
Si Jamito una nang nadakpan niadtong Marso 11, sa Purok 4 sa Barangay 23-C human siya mitunol sa usa ka sachet sa shabu ngadto sa nagpaka-aron-ingonon nga buyer nga sakop sa kapolisan.
Ang sample sa substance nga na-recover gikan sa akusado na-kompirma nga methamphetamine hydrochloride base sa chemistry report sa crime laboratory office sa kapolisan.
Ang sample sa ihi ni Jamito nagpositibo sab sa illegal nga druga.
Si Lovitos nakakaplag sa akusado nga dunay tulobagon sa kaso nga giha-pak batok ngadto kaniya base sa complaint ug mga ebidensya nga gi-presenta sa iyang opesina.
