DAVAO CITY – Laraw karon sa dakbayan sa Davao nga magbaton ug daghanan pa nga mobile libraries ayha matapos ang kasamtangan nga tuig.
Matud pa kang Davao City Librarian Pedrita Badar, gisugyot nila ang P6 million nga kantidad sa mobile library aron nga mapalapdan pa ang masakop sa proyekto ngadto sa 25 ka mga Barangay.
Dugang sa nahisgutan nga ang kasamtangan nga mobile library nagkantidad ug P4.5 million nga lima ka tuig na ang gidugayon apan sa kasamtangan gisaka na nila ang budget ngadto sa P6 milyon ka peso.
Nasayran kang Badar nga bugtong ang mobile library karon sa siyudad maoy motuyok sa 25 barangay dinhi sa siyudad ug mapundo kini sulod sa 14 ka adlaw.
Segun ni Elmer Amarillo, in-charge sa mobile library, nga prayoridad nila nga bisitahon ang mga hilit nga lugar sa Distrito 2 ug 3.
Kalakip sa serbisyo nga gihatag sa mobile library mao ang storytelling diin gamiton niini ang screen pictures aron nga makuha ang atensiyon sa mga bata.
Motanyag sab sila ug computer literacy ingon man tutorial sa mga bata kung paunsa ma-manipulate ang mga electronic gadgets ingon man film showing.
Gitataw sab ni Badar nga plano nila nga motukod ug tulo ka andanas nga e-library apan dili pa mabutyag sa nahisgutan kung asa ang ensakto nga lokasyon.
