DAVAO CITY – Dungan sa pagpadayon sa hinabing pangkalinaw niining milabay nga adlaw tali sa gobyerno ug National Democratic Front of the Philippines (NDFP), naglaom ang kasundalohan nga unta mahatagan na ug igong pagtagad ang mga mulo sa katawhan.
Matud pa kang Army Major Ryan Batchar ang tigpamaba sa 10 IB Philippine Army, nga kalakip ang kasundalohan sa mga nanghinaut nga maundang na ang kagubot ingon man matapos na ang mga dili maayong binuhatan sa mga rebeldeng grupo ug makab-ot ang malungtaron nga kalinaw.
Gitataw sab Army Major Batchar nga kung sensero ang mga rebelde nga makab-ot ang kalinaw, kinahanglan nga ipakita sumala pa kini sa mga nahisgutan sama na lamang sa pag-undang sa mga dili maayong binuhatan sama na lamang sa pagpangilkil sa mga kompanya nga mihatag lamang sumala pa ug kalamboan sa usa ka lugar.
