DAVAO CITY – Abli sumala pa ang kadumalahan sa Armed Forces of the Philippines (AFP) ingon man Philippine National Police (PNP) nga subling mugnaon ang Special Cafgu Active Auxiliary Unit (SCAA) aron nga madungagan pa ang puwersa sa militar.
Matud pa kang Retired Gen. Benito de Leon, head sa Public Safety and Security Command Center (PSSCC) nga buot ni Pangulong Rodrigo Duterte nga inay mga sundalo ang idestino sa mga bukid, mas maayong bansayon ang mga Cafgu ug maoy ipahimutang sa mga lugar nga adunay kagubot sama lamang sa Marilog ug Paquibato ning dakbayan sa Davao.
Nasayran nga 3 ka mga company sa SCAA ang gikinahanglan diin ang matag company langkuban sa tig-120 ka mga miyembro hinungdan nga kinatibuk-ang 360 ang ihap nga kinahanglanon.
Tumong sab sumala pa sa kamugnaan niini mao ang pagtapos sa insurhensiya ilabi na dinhi sa Davao region nga sagad binuhatan sa lawless armed group.
