DAVAO CITY – Nakapa-alarma sab sa Public Safety and Security Command Center (PSSCC) ang report kalabot sa paggamit ug makapalibong nga kemikal sa mga taxi driver ngadto sa ilang mga pasahero.
Sumala pa kang PSSCC Command Center Chief retired Army General Beneito De Leon nga sa Manila nauso ang nahisgutan nga binuhatan, apan nakurat siya nga duna na’y susama nga binuhatan karon sa mga taxi drivers dinhi sa dakbayan, labi na nga adlaw nga daku dihang nahitabo ang insidente.
Kalakip sa mga mi-reklamo sa nahisgutan nga mga binuhatan ang Ateneo De Davao University Faculty, base sa reklamo sa usa ka tinun-an nga nabiktima sa spray mudos sa taxi niadtong Pebrero 18.
Laraw karon sa kagamhanang dakbayan nga oblegahon ang mga taxi driver sa paggamit ug ID ug sa pagtambong sa mga seminar kalabot sa road safety.
Sumala pa kang Assistant City Administrator Atty. Tristan Dwight Domingo subay kini sa bag-ong na-report nga dunay mga taxi driver sa dakbayan sa Davao nga nalambigit sa paggamit ug toxic chemical aron nga malipong ang ilang mga pasahero.
