DAVAO CITY – Tungod sumala pa sa maanomalya nga pagpatuman sa small water impounding project sa lalawigan sa Davao del Sur ang hinungdan nga nag-atubang karon ug kasong graft ang kanhi mayor sa Jose Abad Santos nga sakop kaniadto sa probinsiya sa wala pa namugna ang Davao Occidental.
Nasayran nga gipasaka ang reklamo sa Sandiganbayan 7th Division tungod sa alegasyon nga adunay anomalya sa maong transaksiyon.
Mismong si Assistant Special Prosecutor I Minerva Quintela ang nagmando nga pasakahan ug reklamo si Alexander Wangkay, ingon man ang usa ka Roberto Semilla, nanag-iya sa R. Semilla Construction and Marketing gumikan kay nagkunsabo matud pa ang duruha dihang gipatuman ang proyekto sa milabay nga bulan sa Marso hangtud na sa Abril 2009.
Nasayran nga diretso sumala pa nga gihatag ni Wangkay ngadto kang Semilla ang kontrata sa konstruksyon nga wala mi-agi ug public bidding.
Nag-atubang sab ug laing reklamo ang kanhi Mayor gumikan sa pagpagula niini ug pundo gikan sa panudlanan sa gobyerno nga mokantidad og P4.5 milyones alang sa proyekto.
Kantidad sa P30,000 ang girekomenda nga piyansa sa Sandiganbayan alang sa temporaryo nga kagawasan sa akusado.
