DAVAO CITY – Gisugdan na sa Department of Public Works and Highways (DPWH) Davao Region ang preperasyon alang sa P27 billion nga Davao Coastal Road project diin tumong niini nga makunhuran ang suliran sa trapiko sa siyudad.
Una ng gibutyag ni Konsehal Conrado Baluran, chair of the committee on transportation, nga usa sa mga medium term solutions sa nagkagrabe nga trapiko sa dakbayan mao ang paggahin ug pondo niini nga P34 billion alang sa ipatuman nga proyekto.
Kahinumduman nga mibisita dinhi sa dakbayan si DPWH Secretary Mark Villar sa milabay nga tuig aron nga personal nga masubay ang plano nga itukod sa Times Beach Section sulod karung tuiga.
Mosubay ang Davao Coastal Road duol sa School for the Blind paingon sa Kadayawan NHA, Matina Aplaya, Bolton Isla ngadto na sa Roxas Avenue.
Gawas nga makahatag ug solusyon sa nagkahuot nga dagan sa trapiko, dakong tabang sab sumala pa ang Coastal Road sa tourist attraction gumikan kay mamahimo sab kini nga suruyan ilabi na sa mga mag-jogging ilabi na nga latason niini ang Matina Aplaya, Times Beach ug Roxas Avenue.
