DAVAO CITY – Gikatakda nga ilusad sa Philippine Information Agency (PIA)-Davao ang tulo ka mga information kiosks sa Davao ug Tagum City alang sa Association of Southeast Asian Nations (Asean) 2017 ugmang adlawa, Pebrero 22.
Matud pa kang Efren Elbanbuena, PIA-Davao director nga ang nahisgutan nga kiosk ipatuman aron nga adunay igong kasayuran ang publiko kalabot sa mga mahinungdanon nga impormasyon isip kabahin sa pag-hot sa nasud sa 50th Asean celebration.
Ang information kiosk ipahimutang sa hallway sa pre-departure area sa Davao International Airport ug sa Big8 Corporate Hotel ingon man Robinsons Mall sa Tagum City diin ang launching niini pangunahan ni PIA Director General Harold Clavite ug PIA deputy director general Gelo Villar.
Unod sa information materials ang kasaysayan sa Asean, mga prayoridad niini, ingon man kamahinungdanon sa maong aktibidad sa Mindanao ug ang kalahian niini sa Brunei Darussalam-Indonesia-Malaysia-Philippines East Asean Growth Area.
