DAVAO CITY – Padayon ang pahimangno sa Municipal Disaster Risk Reduction and Management council (MDRRMC) sa Malita Davao Occidental nga kinahanglan mag-igmat ang mga nanimuyo daplin sa mga kadagatan ilabi na kadtong mga naapektohan sa hanging amihan ug monsoon wave.
Sa kasamtangan, kapin 200 na ka mga pamilya o halos 900 ka mga indibidwal ang mihiklin human nga pipila ka mga pinuy-anan ang gihapak sa mga dagkong balud niining milabay nga adlaw.
Sa kasamtangan pipila ka mga tulonghaan sab sa lalawigan sa Malita ang nagkansela sa ilang klase gumikan kay gihimo kining mga evacuation centers.
Pipila niini ang gilangkuban sa Fishing Village Elementary School, Mariano Peralta elementary School, Malita Central, New Agro Elem School, Mana Central ug Bisang Elem. School.
Mas grabe sab nga naapektohan sa paghapak sa mga dagkong balud ang Fishing Village ug Poblacion.
Una na sab nga nagpahimangno sa mga residente sa lugar si Franz Irag ang operation officer sa Office of the Civil Defense (OCD) 11 nga dili magmagahi sa higayon pahiklinon ug dili sab mobalik sa ilang mga pinuy-anan kung walay abiso gikan sa mga hingtundan nga ahensiya sa kagamhanan.
