DAVAO CITY – Naglaom karon ang Regional Department of Tourism (DOT) ug local government sa Sta. Cruz, Davao del Sur nga aprubahan sa Protected Area Management Board (PAMB) ang temporayo nga pag-abli sa giilang pinakataas nga bulkan sa nasud alang sa ipahigayon nga Mt. Apo Boulder Face Challenge.
Matud pa kang DOT XI director Roberto Alabado III, nakahangyo na si PAMB nga i-re-open ang Mt. Apo alang sa maong event nga gikatakda sa bulan sa Abril.
Hinuon gitino sa nahisgutan nga ang sugyot nga ire-open ang bulkan ang istrikto o eklosibo lamang sa mga partisipante sa kalihokan.
Kahinumduman nga kasamtangang gipasirad-an karon ang bulkan human nga gimando sa PAMB nga limitahan ang mga trekkers aron nga dili na mausab ang nahitabo kaniadtong Marso 26 sa milabay nga tuig diin anaa sa 113 ka ektarya sa kasagbutan ang gilamoy sa kalayo nga midaut sa flora ug fauna.
Ang Mt. Apo usa ka protected zone nga adunay mga trails sa Sta. Cruz, Bansalan ug Digos City nga susamang nahimutang sa Davao del Sur ug Makilala, ingon man sa Magpet ug Kidapawan City sa Cotabato.
