DAVAO CITY – Sobsob pa gihapon nga mga entrapment operation ang gilusad sa kapolisan sa Sasa batok ngadto sa mga tigpataya ug last two.
Naila ang pinakaulahing nasikop nga usa ka Jason Larido Ranion, 19 anyos, ug usa ka Rolly Uyanguren Legarto, 32 anyos, pulos mga nanimuyo sa Malagamot, Panacan, ning dakbayan sa Davao.
Nadakpan ang nahisgutan nga mga tigpa-lasto human nga mipahigayon ug entrapment operation ang mga ginsakpan sa Sasa PNP sa pagpanguna ni PO1 Quijano nga nagpaka-aron-ingnon nga mopatad ug Last Two.
Positibo nga gidawat sa dinakpan nga usa ka Jason Larido Ranion ang patad nga baynte pesos.
Dali sab dayon siya nga giposasan sa kapolisan sa Sasa ug karon balhug na sa Sasa Police Station.
Gihikay na ang kasong kalapasan sa Republic Act 9287 o ang illegal numbers game.
Magpadayon ang susama nga mga pagpanakop sa uban pa nga bahin sa dakbayan aron nga masanta na ang pagkaylap sa illegal nga sugal.
