Wala maglakip og pagpirma sa Pax Silica Agreement sa mga kalihokan sa pagbisita ni United States President Donald Trump sa Pilipinas.
Gikumpirma kini ni Presidente Ferdinand “Bongbong” Marcos Jr. sa wala pa ang bilateral meeting nila ni Trump sa Malacañang, human pangutan-on sa mga tigbalita kung adunay planong pagpirma sa framework agreement kalabot sa maong inisyatiba.
Matod ni Marcos, dili hisgotan sa ilang tigom ang Pax Silica Agreement ug wala usab kini sa mga kasabotan nga ilang pirmahan atol sa maong pagbisita.
Una nang gipahayag ni US Ambassador to the Philippines Lee Lipton nga walay kasabotan nga pirmahan kalabot sa maong inisyatiba, nga giuyonan usab ni Marcos.
Apan, wala kini magpasabot nga giundang na ang plano nga kasabotan.
Matud ni Philippine Ambassador to the United States Jose Manuel Romualdez, kinahanglan pang hisgotan ug ayuhon sa duha ka nasud ang mga detalye sa kasabotan sa dili pa kini maisapinal.
Gipahayag usab ni Department of Trade and Industry Undersecretary Ceferino Rodolfo nga target gihapon nga mapirmahan ang legal framework sa Pax Silica sa dili pa matapos ang tuig 2026.
Tumong sa maong inisyatiba nga palig-onon ang supply chain sa mga importanteng teknolohiya sama sa semiconductors ug artificial intelligence.











