Kapin 96 ka pamilya sa Barangay Suawan, Marilog District, Davao City ang nakadawat og ceramic water filters aron matabangan sila sa pagbaton og limpyo ug luwas nga tubig.
Gihatag ang mga water filters atol sa ceremonial turn-over niadtong Agosto 11, 2026, isip kabahin sa paningkamot nga mapalapdan ang akses sa luwas nga suplay sa tubig sa mga komunidad nga adunay limitadong tinubdan niini.
Gipatuman ang programa pinaagi sa pakigtambayayong sa Department of Social Welfare and Development Field Office XI, Clean Water International Philippines, ug Philippine National Police RPSB Cluster 1-C.
Matud ni DSWD Provincial Link Ruel Lagulao, RSW, importante ang maong inisyatiba ilabina alang sa mga pamilya sa 4Ps nga nagpuyo sa lugar nga adunay kakulang sa limpyo nga tubig.
Gipahinumdoman usab ang mga benepisyaryo sa hustong paggamit ug pagmentinar sa ceramic water filters pinaagi sa tabang sa WASH Ambassadors sa barangay.
Base sa assessment sa DSWD, giila ang Barangay Suawan isip usa sa mga komunidad nga adunay dakong panginahanglan sa water filtration.
Pinaagi niini, gilauman nga matabangan ang mga pamilya sa pagpanalipod sa ilang panglawas ug pagpalambo sa ilang kahimtang sa adlaw-adlaw nga panginabuhi. | VIA BOMBO EROS PAJOTA
