Mipadayag og paglaum ug pasalamat ang mga residente sa Barangay 32-D human makabenepisyo ang kapin sa 90 ka katawhan sa libreng medical mission nga gipahigayon didto ning miaging adlaw. Lakip sa natabangan ang mga bata, mga inahan, ug daghang senior citizen nga nanginahanglan og dinaliang atensyong medikal.
Gipasabot sa mga representante sa mga opisina ni Rep. Paolo Duterte ug Vice Mayor Rodrigo Duterte II nga ang Pulong-Pulong ni Pulong Medical Mission usa ka inisyatiba aron madala ang batakang serbisyo sa panglawas sa mga komunidad nga kulang og access sa ospital ug regular nga check-up. Tumong sa programa nga mas sayon maabot sa katawhan ang konsultasyon ug tambal, ilabi na sa mga walay ikakaya sa bayad sa pribadong serbisyong medikal.
Atol sa kalihokan, nagtinabangay ang mga boluntaryong doktor, nars, ug health workers sa paghatag og general medical check-up, eye consultation, ug libre nga tambal alang sa nagkalain-laing sakit. Duna usab mga residente nga nakadawat og espesyal nga pag-atiman base sa ilang kahimtang, ilabi na ang mga tigulang ug adunay kapansanan.
Dugang pa sa serbisyong medikal, gipanghatag usab ang mga pagkaon sama sa lugaw, packed meals, ug mineral water aron maseguro nga dili gutomon ang mga partisipante samtang naghulat sa ilang turno. Alang sa mga mas nanginahanglan, adunay gihahatag nga mga wheelchair isip dugang nga tabang sa ilang adlaw-adlaw nga paglihok.
Naglaum ang mga nagpatuman sa programa nga mapadayon ug mapalapad pa ang susamang medical missions sa ubang barangay sa dakbayan, isip kabahin sa paningkamot nga mapalig-on ang kahimsog sa komunidad ug mapakita nga ang serbisyo sa gobyerno mahimong madala mismo sa katawhan.
