DAVAO CITY – Mapasalamaton karon ang Mati Health Office (CHO) gumikan kay naangkon na nila ang 82 porsyento sa ilang target nga pagbakuna og anti-polio sa singko anyos paubos nga mga bata sa 26 ka mga barangay pipila ka adlaw ayha matapos ang “Sabayang Patak Kontra Polio” sa Disyembre 7.
Una ng gibutyag sa Mati CHO, nakabakuna na sila og kinatibuk-ang 14,328 ka mga bata sukad nga nagsugod ang polio vaccination kaniadtong Nobyembre 25 nga gilangkuban sa 2,687 nga edad 0-11 months ug 11,641 ka mga bata nga edad 12-59 months.
Sa pahayag nga gipagula sa Mati City Information Office, target sa Mati CHO nga mabakunahan ang 17,448 ka mga bata nga nag-edad 5 anyos paubos.
Atol sa ilang pagbisita sa mga barangay, mikabat sa 39 ka mga pamilya ang mibalibad nga pabakunahan ang ilang mga anak tungod sa religious belief ug kahadlok nga mamahimong hinungdan na hinuon kini nga magbalatian ang ilang anak.
Gikumbinsi sumala pa sa Mati CHO ang mga pamilya sa kamahinungdanon sa pagpabakuna luyo sa ilang kaugalingon nga mga pagtuo.
Nasayran sab sa ahensiya nga anaa sa 475 ka mga bata nga edad 5 anyos paubos ang wala sab nabakunahan gumikan sa balatian ug 889 ang wala sa ilang balay dihang gipahigayon ang pagbakuna.
Nasayran nga laing hugna sa vaccination ang gikatakda sa Enero 20 ngadto na sa Pebrero 2, 2020.
