Misaka na sa 7.5 milyon ka tawo ang naapektuhan sa hiniusang epekto sa mga bagyong Luis, Maymay ug Neneng, lakip ang Habagat, sumala sa National Disaster Risk Reduction and Management Council.
Matod sa pinakabag-ong datos hangtod Agosto 23, katugbang kini sa mga 2.1 milyon ka pamilya gikan sa nagkalain-laing rehiyon, lakip ang Ilocos, Cagayan Valley, Central Luzon, Bicol, Western Visayas, Zamboanga Peninsula, Cordillera, Metro Manila, Calabarzon ug Mimaropa.
Dugang pa, 9,872 ka pamilya o 34,103 ka indibidwal ang nagpabilin sa evacuation centers.
Narekord usab ang 29 ka namatay, 19 ka nasamdan ug tulo ka missing, samtang 89 ka lugar ang nagpabiling ubos sa state of calamity.
Lakip sa kadaot ang 2,600 ka partially damaged houses ug 269 ka totally destroyed homes.
Sa pagkakaron, mikabat sa ₱4.9 bilyon ang infrastructure damage ug ₱1.7 bilyon sa agriculture, samtang ₱1.24 bilyon na ang relief assistance nga naipang-apod-apod sa gobyerno.
