Patay ang labing menos unom ka tawo samtang kapin sa 30 ang nasamdan human miigo ang duha ka linog sa kabukiran nga bahin sa Peru kaniadtong Dominggo, Hulyo 19, 2026.
Sumala sa National Seismological Center sa Peru, narekord ang magnitude 5.1 ug magnitude 3.7 nga mga linog sa lalawigan sa Chupaca sa rehiyon sa Junín, mga 300 kilometro sa sidlakan sa kapital nga Lima.
Gikanayon sa ahensya nga ang unang linog adunay giladmon nga 24 kilometro, samtang ang ikaduhang linog adunay giladmon nga 18 kilometro.
Una nang gitaho sa European-Mediterranean Seismological Centre nga magnitude 5.6 ang kusog sa unang paglinog.
Base sa inisyal nga report, mokabat sa 48 ka balay ang hingpit nga naguba samtang 18 pa ang nadaot, nga nakaapekto sa gibana-banang 300 ka residente. Gihatagan na sila og mga tolda isip temporaryong kapuy-an.
Kadaghanan sa mga balay sa apektadong mga komunidad sa Chupaca hinimo sa adobe blocks nga dali madaot kung adunay kusog nga linog.
Nagpadayon pa sa pagpangita ang mga awtoridad sa mga posibleng natabonan sa mga nahugno nga mga debris.
Sama sa Pilipinas, nahimutang ang Peru sa Pacific Ring of Fire, usa ka rehiyon diin mahitabo ang gibana-banang 85 porsiyento sa tanang linog sa kalibotan.
