Mga 8,000 ka eskwelahan ug 6 ka milyon ka estudyante sa tibuok nasod ang naapektuhan sa pagbaha ug kusog nga pag-ulan tungod sa sunod-sunod nga bagyo ug epekto sa habagat.
Matud sa Department of Education o DepEd, lakip sa nakaapekto ang Tropical Cyclones Luis ug Maymay nga miresulta sa pagbaha ug pagguho sa yuta sa pipila ka lugar.
Tungod niini, adunay mga eskwelahan nga nagsuspinde og klase sulod sa pipila ka adlaw, hinungdan nga kinahanglan bawi-on ang nawalang mga adlaw sa pag-eskwela.
Matud ni Education Secretary Sonny Angara, katumbas kini sa hapit ikalimang bahin sa kinatibuk-ang gidaghanon sa mga eskwelahan sa nasod, apan posible pa mosaka ang numero tungod kay wala pa kompleto ang tanang report.
Gipasabot ni Angara nga adunay igong panahon sa bag-ong three-term academic calendar aron mabawi sa mga estudyante ang mga adlaw nga wala’y klase.
Sa pinakabag-o nga report sa DepEd, 217 ka eskwelahan ang gigamit gihapon isip evacuation centers alang sa kapin 6,400 ka pamilya.
Nanginahanglan usab og P32.69 milyon alang sa clearing operations sa 1,157 ka eskwelahan, samtang P192.86 milyon ang gikinahanglan alang sa pag-ayo sa 3,936 ka nadaot nga eskwelahan.
Pinakadaghan nga naapektuhan ang Ilocos Region, gisundan sa Central Luzon ug Cordillera Administrative Region. | VIA BOMBO EROS PAJOTA
