Gilusad dinhi sa Davao Region ang usa ka Job fair atol sa 124th Labor Day karong adlawa aron hatagan og oportunidad ang mga job seekers.
Usa sa mga ipahigayon nga job fair ang nahimutang sa usa ka mall sa Tagum City, Davao del Norte ug sa uban bahin sa Davao Region ilabi dinhi sa dakbayan sa Davao.
Ang tema sa maong selebrasyon mao ang “Disenteng Trabaho Para sa Lahat: Isang Hanggarin, Bagong Pilipinas, Sama-samang Mararating,” nga nagtumong sa pagpalig-on sa oportunidad sa panginabuhian sa mga Pilipino.
Subay sa datos sa DOLE XI, muabot sa kapin 5,700 ka mga bakanteng trabaho ang gihanyag sa mga nagkadaiyang job fair sa Davao Region.
Subay sa ulahing datos gikan sa maong ahensya, gikan kaganihang alas Dusi sa udto sa SM City Davao anaa na sa 627 ka jobseekers ang ni-register isip kabahin sa ilahang pagpaningkamot nga makakaplag og bag-ong trabaho diin adunay 40 ka mga aplikante ang hired on the spot (HOTS) samtang 78 ka aplikante ang gi-identify nga near-hires ug gipaandam na sa pagsumite sa kulang nga dokumento ug pagpadayon sa final interviews.
Ang Department of Labor and Employment Region XI nagpadayon sa pagkonekta sa mga jobseekers ug mga employers, aron mas mapaduol pa ang mga oportunidad sa trabaho alang sa publiko.
Gawas sa job fair, gipatuman usab ang usa ka emergency employment program nga naghatag og prayoridad sa sektor sa transportasyon. Sumala kang Atty. Randolf C. Pensoy, Regional Director sa DOLE XI, gipatuman ang maong programa kauban ang Land Transportation Franchising and Regulatory Board o LTFRB.
Gipaklaro usab nga prayoridad sa maong programa ang mga lisensyadong driver ubos sa kampanya nga “Tuloy PASADA,” aron matabangan ang mga naapektuhan sa sektor sa transportasyon. Dugang pa ni Pensoy, mokabat sa 1,000 ka benepisyaryo ang target nga matabangan sa maong programa.
