Tinuyong gibilin sa mga suspek nga nakamaskara ang lima ka lungon nga nadiskobrehan sa nagkalain-laing lugar sa Metro Manila, sumala sa National Capital Region Police Office (NCRPO) kaganihang kaadlawon sa Biyernes, Agosto 7.
Sa usa ka pahayag, gikumpirma sa NCRPO ang pagkadiskubre sa mga lungon sa Sta. Cruz, Manila; Barangay 54 sa Caloocan City; Barangay South Triangle sa Quezon City; Barangay Sta. Teresita sa Quezon City; ug sa Gil Puyat sa Makati City.
Matod sa NCRPO, duha ka van nga puti ug abuhon ang gigamit sa mga suspek sa pagbiya sa mga lungon nga adunay mga mensahe batok sa China ug Communist Party of the Philippines-New People’s Army (CPP-NPA).
May kalabotan niini, gimandoan na ni PNP Chief Gen. Jose Melencio Nartatez Jr. ang komprehensibong imbestigasyon kabahin sa pagbilin sa maong mga lungon.
Sa pagkakaron, nagpadayon ang mga imbestigador sa NCRPO sa backtracking ug forward tracking sa mga CCTV footage sa posibleng giagian sa mga suspek.
Samtang, gipasalig sa kapulisan nga papanubagon ang mga responsable sa ilang giingong “duwag na gawain” pinaagi sa pagpanukod sa mga naghimo niini ug pagsang-at og kasong kriminal human makompleto ang imbestigasyon.
