Gipasidunggan sa Office of the Vice President ang 40 ka war veterans sa Davao City isip kabahin sa umaabot nga pagsaulog sa National Heroes Day.
Gipangulohan ni Vice President Sara Duterte ang maong aktibidad aron personal nga ilhon ang kaisog, serbisyo ug mga sakripisyo sa mga beterano nga mitabang sa pagpanalipod sa nasud.
Atol sa programa, gihatagan og pag-ila ang mga war veterans tungod sa ilang kontribusyon ug dedikasyon sa panahon sa ilang pagserbisyo. Tumong sa maong kalihokan nga mapakita ang pagpasalamat sa mga beterano ug mapabiling buhi ang ilang mga istorya ug kasinatian alang sa mas batan-ong henerasyon.
Sumala sa OVP, ang mga kasinatian ug sakripisyo sa mga beterano mahimong inspirasyon sa mga mosunod nga henerasyon, ilabi na sa paghatag og bili sa serbisyo, kaisog ug pagpanalipod sa nasud.
Dugang pa, ang aktibidad gihimo isip pagpangandam sa National Heroes Day, diin gina-recognize ang kontribusyon sa mga Pilipinong mitabang sa pagdepensa ug pag-alagad sa nasud.
Sa pagkakaron, padayon ang mga kalihokan sa OVP nga may kalabotan sa pagpasidungog sa mga beterano ug uban pang indibidwal nga adunay dakong kontribusyon sa komunidad ug sa nasud Pilipinas.| VIA BOMBO EROS PAJOTA
