Patay ang 22 ka mga kindergarten nga mga bata ug 3 ka mga magtutudlo, human nga miulbo ang kalayo sa usa ka school bus, kagahapong adlawa, pasado alas 12:30 ang takna sa udto, sa nasud Thailand.
Nasayran nga adunay sakay ang maong school bus nga 38 ka mga kindergarten ug unom ka mga magtutudlo, apan dali nga nakaluwas ang 19 ka mga indibidwal apan nahibilin ang laing 25 sa sulod sa maong nagadilaab na nga bus.
Subay sa inisyal nga imbestigasyon sa mga otoridad sa Thailand, usa matud pa sa rason ang pagbusikad sa usa ka ligid niini hinungdan nga naka trigger sumala pa ug spark sa sulod nga engine sa maong sakyanan, rason nga midilaab kining maong kalayo.
Sumala pa sa taho nga nagbyahe kining school bus, gikan sa usa ka tulunghaan sa Uthai Thani, usa ka probinsya sa Bangkok ayha pa nahitabo ang maong insidente.
Nahibal-an nga naka convoy matud pa ang maong bus, diin anaa kini sa ikaduha nga nakasunod sa maong convoy ug padulong sumala pa kini sa usa ka exhibition sa Electricity Generating Authority sa Thailand.
Gipasalig sab sa gobyerno sa Thainland, nga tubagon karun sa ilahang panggamhanan ang tanang galastuhon sa mga biktima, lakip na usab nga nagpaabot kini sa ilahang pahisubo ngadto sa mga nahabiling pamilya sa mga biktima.
