Nasikop sa kapulisan sa Police Regional Office 11 (PRO 11) ang duha ka High-Value Individuals nga giila sa alyas “Dodong” ug “Drake” sa gipatigayon nga anti-illegal drug operation sa Lupon, Davao Oriental. Sumala pa sa PRO 11, gidumala ang operasyon sa Regional Police Drug Enforcement Unit 11 (RPDEU 11) kauban ang Lupon Municipal Police Station ug ubang operatiba, ilalom sa koordinasyon sa PDEA Region 11.
Gihimo ang operasyon niadtong Hunyo 2, 2026 sa Purok Hayahay, Barangay Poblacion, Lupon, diin nadakpan ang duha ka suspek nga giingong HVI’s sa illegal drug trade. Dugang pa niini, nakumpiska sa mga otoridad ang gibanabana nga 220 gramos nga gidudahang shabu nga adunay standard drug price nga mokabat sa ₱1,496,000, lakip sa lain-laing ebidensya nga gituohang konektado sa iligal nga kalihukan.
Sumala pa ni PRO 11 Director PBGEN Leon Victor Z. Rosete, ang maong kalampusan kabahin sa padayon nga kampanya batok sa iligal nga droga aron mapanalipdan ang katawhan ug maputol ang drug networks sa rehiyon.Lakip sa iyang pamahayag, giingon niya nga ang matag malampuson nga operasyon usa ka lakang padulong sa mas luwas nga komunidad, ug nagpabilin ang ilang pasalig sa intelligence-driven operations ug pagsunod sa due process ug human rights.
Sa pagkakaron, padayon ang imbestigasyon ug legal nga proseso batok sa duha ka nadakpan, samtang nagpadayon usab ang panawagan sa PRO 11 ngadto sa publiko nga magbantay ug motabang pinaagi sa pag-report sa mga kahimtang nga may kalabotan sa iligal nga droga sa rehiyon.
