Dili kuno sayon mahitabo o “extremely unfeasible” ang ekstradisyon ngadto sa Amerika sa napriso nga founder sa Kingdom of Jesus Christ (KOJC) nga si Pastor Apollo Quiboloy tungod sa mga kaso nga iyang giatubang sa Pilipinas.
Gipasabot sa abogado sa pastor nga si Atty. Ferdinand Topacio nga kasagarang dili dayon aprobahan ang ekstradisyon kung ang usa ka tawo nag-atubang og kriminal nga kaso ug naghulat pa nga matapos ang pagdungog sa kaso o masilbihan ang sentensiya kung mapamatud-an nga sad-an.
Apan, matod niya, mahimo gihapon nga tugotan sa hudikatura ang hangyo alang sa ekstradisyon.
Sa pagkakaron, sumala kang Atty. Topacio, wala pa sila makadawat og notice o summons may kalabotan sa bisan unsang proseso sa ekstradisyon, apan andam kuno silang tubagon ang maong petisyon.
Gipasiugda usab sa abogado nga dili basta-basta mahatag si Quiboloy ngadto sa Estados Unidos hangtod nga dili pa mahuman ug masulbad ang mga kaso nga iyang giatubang sulod sa nasud.
Gipagawas ni Atty. Topacio ang maong pahayag human sa hangyo sa gobyerno sa Amerika nga ipa-ekstradisyon si Quiboloy tungod sa iyang giatubang nga kaso sa sex trafficking ug racketeering sa maong nasud.
