Gipangandaman sa House prosecution ang paggamit sa mga kopya mismo sa Office of the Vice President kon OVP sa liquidation reports aron malikayan ang dugay nga paglantugi sa authentication ug mapadali ang impeachment proceedings. Sumala pa ni Atty. Benjamin “Jay” Tolosa Jr., tigpamaba sa House prosecution, gikan mismo sa OVP ang mga dokumento ug gisumite kini sa Commission on Audit kon COA.
Gipasabot ni Tolosa nga mahimong itandi una sa duha ka kampo ang ilang mga dokumento ug gamiton ang mga parehas nga rekord aron malikayan ang balik-balik nga pagpatin-aw sa authenticity sa mga dokumento atol sa hearing.Dugang pa, gihatagan og gibug-aton ni Tolosa ang maong lakang tungod kay liboan ka dokumento ang kabahin sa mga ebidensiya sa Article I. Giklaro hinuon niya nga kung walay kasabutan ang duha ka kampo, mahimo gihapon nga pamatud-an sa prosecution sa open court ang authenticity sa mga rekord, apan posible nga molungtad pa og dugay ang pagtaral.
Samtang, gilauman nga atubangon sa masusing pagpangutana sa prosecution sila Gina Acosta ug Edward Fajarda, nga nagsilbing Special Disbursing Officers o SDO sa OVP ug Department of Education o DepEd. Giila ni Tolosa nga hostile witnesses ang duha tungod kay posibleng dili uyon sa interes sa prosecution ang ilang mga pahayag. Gipunting usab nga importante ang ilang testimonya tungod kay sila mismo ang personal nga nakadawat sa cash gikan sa confidential funds.
Gipangayo sa prosecution nga masuta kung asa gidala ug giunsa paggamit ang maong kuwarta hangtod sa liquidation niini. Giklaro usab nga mahimong mogamit ang prosecution og leading questions sa pagpangutana sa duha ka testigo, apan ang mga senator-judge gihapon ang magbuot sa gibug-aton sa ilang testimonya.
Lakip sa mga mahimong basihan sa mga senator-judge ang bank records, liquidation documents ug findings sa Commission on Audit. Sa kasamtangan, nagpadayon ang pag-andam sa House prosecution sa mga dokumento ug testigo nga ipresenta sa impeachment proceedings.
