Gibutyag ni Senador Francis “kiko” Pangilinan nga kinahanglan mahibal-an ug mapasabot sa publiko kung asa gigasto ang matag pondo nga gigahin sa gobyerno alang sa mga proyekto batok sa pagbaha.
Nanawagan usab ang senador alang sa usa ka komprehensibo nga national flood management plan samtang padayon nga gibahaan ang pipila ka bahin sa metro manila ug mga kasikbit nga probinsya tungod sa kusog nga habagat.
Sumala pa ni Pangilinan, dili igo nga mahibal-an lamang kung pila ang budget alang sa flood control.
Kinahanglan usab nga klaro kung unsang mga proyekto ang gipondohan, asa kini gipahigayon, pila ang gigasto, kinsa ang mga contractor, unsa na ang kahimtang sa implementasyon ug kung epektibo ba ang mga proyekto.
Gibutyag sa senador nga dili angay nga kutob lamang sa papel ang mga proyekto nga gitumong unta sa pagpanalipod sa mga komunidad batok sa pagbaha, kondili kinahanglan makita ang aktuwal nga resulta niini sa mga lugar nga ilang giserbisyohan.
Dugang pa niini, gihimo ni Pangilinan ang panawagan samtang padayon nga nakaapekto ang pagbaha sa klase, trabaho, negosyo ug transportasyon sa pipila ka lugar.
Gipunting usab niya ang panginahanglan alang sa usa ka dugayng panahon ug magkahiusang flood management plan sa tibuok nasod aron dili lamang magsalig ang gobyerno sa emergency response matag kusog nga pag-ulan.
Alang kang Pangilinan, kinahanglan nga preventive, science-based ug transparent ang maong national flood management plan, lakip ang pagtagad sa epekto sa climate change ug uban pang environmental concerns.
