Nakaabot sa P135.3 milyon ang kantidad sa kadaot ug kapildihan sa sektor sa agrikultura tungod sa pag-igo sa mga niaging bagyong Maymay, Luis ug habagat.
Base sa nagpadayon nga pagsusi sa kadaot nga gihimo sa mga rehiyonal nga buhatan sa Department of Agriculture (DA), natala ang mga kadaot sa agrikultura sa Ilocos Region, Central Luzon, Calabarzon, Mimaropa ug Western Visayas.
Kapin 4,000 ektarya nga mga lugar nga pang-agrikultura ang naapektuhan sa mga kalamidad.
Pinakagrabe ang kadaot ug kapildihan sa humay, gisundan sa mais, high-value crops, kahayupan ug manok, ingon man ang mga pasilidad sa irigasyon, makina ug kagamitan.
Miabot usab sa 4,465 metriko tonelada ang nawala sa produksiyon tungod sa mga kadaot nga gipahinabo sa mga kalamidad.
Isip tubag sa sitwasyon, giingon sa DA nga mahimong makadawat ang mga apektadong mag-uuma og P106.5 milyon nga kantidad sa mga gamit pang-uma, lakip ang humay, mais ug mga liso sa utanon.
Mahimo usab silang makapangutang og hangtod P25,000 ubos sa Survival and Recovery Loan Program sa Agricultural Credit Policy Council aron makatabang sa ilang pagbangon ug pagpadayon sa ilang panginabuhian. | via Bombo Ray Ann Martinez
