DAVAO CITY – Sikop ang usa ka 19 anyos nga estudyante gumikan sa paghupot og iligal nga druga. Sa impormasyon gikan sa Baliok Police Station, giila ang maong batan-on nga si Glenn Free Tare Cemini alyas Tom-tom, 19 anyos, ulitawo, usa ka estudyante, ug temporaryong nagpuyo sa Purok 12 Km. 12 Brgy. Catalunan Pequeño ning syudad.
Nasayran subay sa imbestigasyon nga aduna matud pay nagpahibalo nga usa ka concerned citizen sa buhatan sa kapulisan mahitungod sa matud pa gikatahapang iligal nga druga nga anaa sa Rechelle Store nga nahimutang ra usab sa nahisgtang dapit bandang alas 9:00 kagabii.
Gi-aresto ang suspek human nga positibo kining giila sa mga witness nga sila Rosie Labus Alipaopao, 59 anyos ug Jenny Labus Alipaopao, 18 anyos nga maoy nagbilin sa usa ka yellow white nga karton atubangan sa ilang sari-sari store dala ang pasangil nga ang maong kahon ang aduna matud pay unod nga basura.
Apan sa gihimong berepikasyon, nasayran nga ang unod diay sa maong kahon mao ang 19 ka sachet sa pinaugang dahon sa marijuana ug usa ka digital nga timbangan.
Gilayon nga nanawag ang mga saksi sa Catalunan Pequeño duty Force Multipliers ug sa Duty Police Officer nga miresulta usab sa pagkasikop sa maong suspek nga gikonsiderang Street Level Individual.
Gibana-banaang anaa sa kapin kun kulang P45,000 ang kantidad sa maong iligal nga druga nga adunay gimbug-aton nga 300 grams. Gikustodiya na karon ang maong batan-on sa Baliok Police Station ug gikatakdang pasakahan og kaso.
