Gipailawom na sa Office of the Ombudsman sa lifestyle checks ang 107 ka government officials isip kabahin sa mas hugot nga pagsusi sa ilang mga kabtangan, kita ug lifestyle.
Sumala Ombudsman Jesus Crispin Remulla nga kadaghanan sa mga opisyal nga ginasusi gikan sa gitawag nga income-generating agencies, lakip ang Land Transportation Office (LTO) ug Bureau of Customs (BOC).
Posible pang mudaghan ang ihap sa mga government officials nga maapil sa lifestyle checks samtang padayon ang pagpangolekta ug pag-verify sa impormasyon sa Ombudsman.
Ang maong lakang gihimo subay sa direktiba ni Pangulong Ferdinand Marcos Jr. nga ipaubos sa lifestyle checks ang mga opisyal sa gobyerno aron masuta kon ang ilang lifestyle ug mga kabtangan nagtugma ba sa ilang legal nga kita.
Nagsugod ang mas hugot nga monitoring human adunay pipila ka government officials nga nalambigit sa mga alegasyon sa anomalya sa flood control projects sa nasud.
Wala pa gipadayag ang kumpletong listahan sa 107 ka opisyal nga ginasusi, samtang nagpadayon ang Ombudsman sa pagkuha og dugang impormasyon ug pag-evaluate sa posibleng pagpalapad sa lifestyle checks.
