Na-isolate ang mga 1,000 ka pamilya, lakip ang mga lumad, sa Barangay Santa Fe, San Marcelino, Zambales, human gilapawan sa lahar ang ilang komunidad ug naguba ang usa ka tulay tungod sa kusog nga pag-ulan nga dala sa Habagat.
Sumala ni San Marcelino Mayor Elvis Ragadio Soria, anam-anam nga natabonan sa lahar ang mga balay human maguba ang usa ka dike tungod sa kusog nga ulan nga gikan sa Mount Pinatubo. Napulo ka balay ang hingpit nga naguba samtang 22 ang partially damaged.
Niabot ang tulo ka adlaw nga food supply gikan sa lokal nga mga awtoridad alang sa mga apektadong residente human naguba ang tulay kaniadtong Agosto 9,2026 nga nakatanggog sa pipila ka pamilya ug lumad nga residente.
Gipangandam sa San Marcelino local government unit ang pagtukod og kahoy nga footbridge alang sa mga pedestrian ug temporaryong steel bridge alang sa mga tricycle kung magpadayon ang maayong panahon sulod sa sunod duha hangtod tulo ka adlaw.
Samtang naghulat sa temporaryong mga tulay, nag-atubang ang mga residente og kalisod sa pagtabok tungod sa mga bato ug lapok nga nahabilin sa lugar.
Gipasabot ni Mayor Soria nga ang permanenteng solusyon mao ang pagtukod og bag-ong tulay nga mas taas kaysa sa daang estruktura aron mabalik ang access tali sa Old Santa Fe ug New Santa Fe.
Miabot sa gibana-banang ₱2.5 milyon ang kadaot sa agrikultura, samtang milapas sa ₱10 milyon ang kadaot sa mga residential property, base sa rekord sa LGU.
Hinuon, wala pa’y gikataho nga namatay o nasamdan sa maong insidente.
