DAVAO CITY – Opisyal nang gideklara isip “fugitive” si Kingdom of Jesus Christ founder Pastor Apollo Quiboloy, gumikan sa pagtago-tago niini human nga gihatag na ang warrant of arrest nga gi-isyuhan na sa Davao Regional Trial Court Branch 12 kagahapon.
Sumala pa ni NBI Davao region chief, Arcelito Albao, bisan wala pa kini hingpit nga naaresto kagahapon, magpabilin kining usa ka fugitive kon pagabasehan ang giisyu nga warrant of arrest sa korte. Samtang sa bahin sa Davao City Police Office (DCPO), gikumpirma niini nga nadawat na nila ang warrant of arrest nga gipaguwa sa Davao City RTC batok kang Quiboloy.
Gawas kaniya, damay sab ang lima ka mga kasabwat sa kasong paglapas sa Republic Act 7610, kon Special Protection of Children Against Abuse, Exploitation and Discrimination Law.
Apan kagahapon, nakapyansa ug temporaryong gawasnon sila Tamayong Brgy. Captain Cresente Canada, Paulene Canada ug Sylvia Cemanes sa nahisgutang krimen human sa gihimong pag-aresto kanila sa NBI.
Samtang at large gihapon ang mga suspek nga sila Jackielyn Roy ug Ingrid Canada.
Kahinomdoman nga niadtong unang bahin sa Marso, ang DOJ nag mando sa pagpasaka og kaso sexual abuse and qualified human trafficking ngadto sa managlahing korte batok kang Pastor Quiboloy.
Nasayran nga dunay probable cause ang RTC aron ipa-warrant ang televangelist, apan nagpasaka ang iyang kampo og motion to defer or suspend proceedings ingon man ang pagpa-hold sa arrest warrant batok kaniya.
Nanghinaot si Davao Region Police Director, P/BGen Alden Delvo nga mopakita na si Quiboloy o mo-surrender sa umaabot nga mga adlaw apan kun dili gihapon kini makagawas sa iyang gitagoan, molusad sila og manhunt batok sa maong Pastor.
Sa pikas bahin, nagpasalamat si Senator Risa Hontiveros ang nahitabong pagpasaka og warrant of arrest batok kang Quiboloy, ug nagkanayon nga pipila na lamang ang malipayong adlaw sa nahisgutang pastor.
