Gipaklaro ni Vice President Sara Duterte nga wala siyay personal nga panagbingkil kang Pangulong Ferdinand “Bongbong” Marcos Jr., apan nagpadayon ang iyang pagsupak sa pamaagi sa pagdumala sa administrasyon.
Nagkanayon si VP Sara sa usa ka pakighinabi sa The Hague, Netherlands, nga ang iyang mga kritisismo nakapunting sa pagdumala sa Pangulo isip lider sa nasod ug dili sa iyang personalidad.
Gipasabot sa Bise Presidente nga ang tanan niyang mga komentaryo batok sa administrasyon kabahin sa iyang katungod sa gawasnong pagpahayag ug dili tungod sa personal nga panagbangi.
Kahinumdomang nagkauban sa politikal nga koalisyon ang Presidente ug ang Bise Presidente ubos sa UniTeam sa eleksyon kaniadtong 2022. Apan, nabungkag ang ilang politikal nga alyansa human mibugnaw ang ilang relasyon, nga misangpot sa pagbiya ni Duterte isip Kalihim sa Department of Education.
Nagpadayon usab ang impeachment trial batok kang VP Sara Duterte. Lakip sa mga isyung gihisgutan sa reklamo ang iyang pahayag atol sa usa ka online press conference nga nanghulgang patyon ang Pangulo, Unang Ginang, ug si kanhi House Speaker Martin Romualdez kon adunay mahitabo nga daotan kaniya.
