Gibutyag ni Vice President Sara Duterte nga ang kalit nga rally nga gihimo sa mga miyembro sa Iglesia Ni Cristo (INC) sa bahin sa EDSA White Plains nagpakita sa dugay na niyang gipadayag nga mga kabalaka batok sa kasamtangang administrasyon.
Sumala pa sa Bise Presidente, ang maong kalihokan usa ka timailhan sa padayon nga pagkadismaya sa pipila ka sektor sa publiko ug nagpakita, matud pa niya, sa giingong kahuyang sa pagpangulo sa kasamtangang administrasyon.
Dugang pa niini, gikanayon usab ni Duterte nga wala matubag sa gobyerno ang mga nag-unang problema sa katawhan, lakip ang padayon nga pagsaka sa presyo sa mga batakang palaliton, kakulang sa oportunidad sa trabaho, ug ang giingong kakulang sa pagtagad sa mga kabalaka sa publiko. Lakip sa iyang mga giakusahan, matud pa niya nga gigamit sa administrasyong Marcos ang justice system aron kasuhan ug mapriso ang mga indibidwal nga mosaway sa gobyerno.
Kahinumduman, milabay lang ang usa ka adlaw sukad gipahibalo sa Office of the Ombudsman nga giandam na niini ang kasong plunder batok kang Senador Rodante Marcoleta, sa dihang gipahigayon sa liboan ka mga miyembro sa INC ang kalit nga rally bahin sa EDSA White Plains.
