Nagpadayon si US President Donald Trump sa iyang kampanya alang sa midterm elections sa Nobyembre 3,2026 samtang nag-atubang og legal nga hagit ang iyang administrasyon sa paningkamot nga maapektuhan ang pag-ihap sa mga balota sa California.
Sa rally sa Port Huron, Michigan, kaniadtong Domingo, Oktubre 25, 2026 gibalik ni Trump ang iyang mga pag-atake sa Democratic Senate candidate nga si Abdul El-Sayed, lakip ang mga pahayag nga nagpunting sa iyang Muslim nga pagtuo. Gitawag usab siya ni Trump og “jihadist,” bisan walay ebidensiyang gihatag nga mosuporta sa maong pag-angkon.
Samtang, nagpakita og pagduhaduha ang mga huwes sa federal appeals court sa hangyo sa administrasyong Trump nga pugngan ang pag-ihap sa kapin 20,000 ka mail-in ballots sa California nga giingong nalambigit sa mga botanteng posibleng dili US citizens.
Gipangutana sa mga huwes ang kasaligan sa listahan nga gigamit sa gobyerno ug gipasiugda nga adunay mga isyu sa kamatuoran nga kinahanglan pang susihon. Matud sa usa ka huwes, makita usab nga adunay legal nga awtoridad ang California sa pagdumala sa kaugalingong eleksiyon.
Gipasakaan sa US Department of Justice og kaso ang California ug Los Angeles County aron mapugngan ang pag-ihap sa maong mga balota. Sa pagkahuman sa hearing, miingon ang korte nga mopagawas kini og desisyon sa labing dali nga panahon.
Nagkampanya si Trump sa mga estado nga kasagarang gisuportahan sa Republican Party, lakip ang Mississippi, Texas, Ohio, Florida ug Iowa, sa kataposang siyam ka adlaw sa wala pa ang eleksiyon.
Gihangyo usab Presidente ang mga botante nga motambong ug mobotar, tungod sa kabalaka sa suporta sa mga kandidato sa Republican ug sa kasuko sa pipila ka botante kabahin sa gubat sa Iran ug kahimtang sa ekonomiya.
