DAVAO CITY – Anaa na karon sa kustodiya sa Philippine Army, 10th Infantry Division ang usa sa mga suspek sa Yvonne Chua Plaza Murder Case.
Giila ang suspek nga si Private First Class Rolly (PFC) Cabal nga una nang nawala o gikatahong ‘missing’ human nag awol o ‘absent without official leave’.
Sumala pa sa otoridad, anaa lamang sa probinsya sa Davao de Oro si Cabal diin, nagtago tungod sa kahadlok nga gibati atong gipatawag sila alang sa board of inquiry.
Sumala pa usab sa impormasyon, boluntaryo kini nga nidangop ngadto sa 10th Infantry Division nga resulta sa walay puas nga koordinasyon sa otoridad kaniya.
Giingon usab nga cooperative ang sundalo sa imbestigasyon mahitungod sa Special Investigation Task Group Plaza kon SITG Plaza.
Ika-upat si Private First Class Cabal sa mga suspek nga anaa na karon sa kustodiya sa Philippine Army.
Kahinomdoman usab nga una nang gikompirma sa 10th ID kaniadtong bulan sa Enero ning tuig nga anaa na sa ilahang buhatan ang tulo ka mga suspek sa murder case nga sina SSg Gilbert Plaza; Sgt. Delfin Sialsa Jr.; ug Cpl Adrian Cachero.
Sa kasamtangan, padayon pa gihapon nga ginapingita ang usa sa mga “at large” nga suspek nga si PFC Romart Longakit; nga gikatahong gidagit.
