DAVAO CITY – Tingkagol karon sa prisohan ang usa ka 40 anyos nga drayber human nga positibo kining napalitan og iligal nga druga sa usa ka pulis nga nagpaka-aron-ingnong buyer atol sa gipahigayong drug buy bust operation sa Toril Police Station sa Brgy. Lubogan, Toril ning syudad.
Giila ang suspek nga si alyas Mario, 40 anyos, minyo, drayber ug residente sa Toril ning dakbayan. Atol sa maong operasyon, nakumpiska gikan sa posisyon sa dinakpan ang ubay-ubay ka mga sachet sa shabu.
Gi-konsidera ang dinakpan nga Top 5 Drug Personality Station Level ug anaa na kini karon sa kustodiya sa Toril PNP ug gihikay na ang kasong paglapas sa R.A. 9165 o Comprehensive Dangerous Drug Act of 2002 batok sa nahisgutan.
Ginalantaw karon sa kapulisan ang pagkasikop sa maong suspetsado ang mamahimong usa sa hinungdan sa pagkunhod sa pagpamaligya ug paggamit sa iligal nga droga, dili lamang sa Toril apan lakip na sa mga kasikbit nga lugar sa dakbayan.
