DAVAO CITY – Gilamoy sa kalayo ang Madrasah Arabiya Wal Islamiyah nga usa ka Arabic School nga nahimutang sa Purok 7,Phase 3, Muslim Village, NHA Bangkal ning siyudad sa Dabaw.
Rason matud pa sa pag-ulbo sa maong kalayo mao ang elecritical fault wiring. Nagsugod ang kalayo sa nahisgutang eskwelahan ug midagan paingon sa pikas bahin nga kwarto kung asa nagpuyo si Adolfo Badilla nga usa ka renter uban iyang pamilya. Ang tag-iya sa maong balay mao si Alem Cabaguio nga usa ka Imam sa maong lugar.
Sumala pa, nagsugod ang kalayo bandang 10:25 kaganinang buntag ug totally controlled o gilayon kining napalong bandang 10:58 sa buntag.
Dugang pa niya, adunay mga bata nga nagasulod-gawas sa eskwelahan aron magdula o magpahangin. Subay sa nakuhang detalye, light material o plywood lamang ang gigamit aron matunga ang maong building kung asa nahimutang ang eskwelahan ug ang balay nga girentahan rason nga paspas ang pagkatag sa kalayo paingon sa balay.
Gibana-banaan nga anaa sa PHP 300,000 ang damyos sa sunog. Lakip sa mga nasunog ang mga passport sa anak sa maong renter ug pipila lamang nga mga sanina ang nasalbar mahitungod sa ikaduhang pagsulay ni Adolfo nga mubalik pa sa sulod, migrabe na ang kalayo ug di na niya kaya ang kainit.
Hinuon, walay natala nga nasamdan sa maong insidente tungod matag sabado ug dominggo lamang ang klase sa mga bata.
