Gibutyag sa United States Department of State ang planong pagtukod sa usa ka 4,000-acre industrial hub sa Pilipinas, subay sa pakigtambayayong sa Estados Unidos ug Pilipinas.
Sumala pa sa report, ang maong proyekto kabahin sa Pax Silica Initiative diin apil ang Pilipinas isip ika-13 ka nasod nga mipirma niini. Lakip niini, tumong sa maong inisyatiba nga mapalig-on ang supply chain sa artificial intelligence (AI), semiconductor, ug ubang critical minerals, subay sa paningkamot sa US nga dili masobraan ang pagsalig sa mga nasod nga giisip nilang rivals.
Dugang pa niini, gilauman nga ang Pilipinas mahimong sentro sa pagpalapad sa production, manufacturing, ug data infrastructure sa rehiyon pinaagi sa maong kooperasyon. Sa pagkakaron, lakip sa ubang mipirma sa Pax Silica mao ang Australia, Finland, India, Qatar, South Korea, ug Singapore, nga nagpakita sa mas lapad nga global partnership sa teknolohiya ug ekonomiya.
Sa kasamtangan, giisip sa US ang maong inisyatiba isip kabahin sa ilang economic statecraft strategy aron mapalig-on ang alyansa ug matubag ang global supply chain security sa teknolohiya.
