DAVAO CITY – Nagpadayon pa ang imbestigasyon sa kapolisan may kalabotan sa pagkapusil sa upat ka mga tawo nga sakay ug motorsiklo, diin duha ang gikatala nga angol.
Pabilin karon nga gitambalan sa Davao del Sur Provincial Hospital ang driver sa motorsiklo nga napusilan, lakip na ang angkas niini.
Naila ang mga biktima nga sila si Ralp Joseph Cabahug, 31 anyos, nakahi-agum ug samad sa wala nga bahin sa iyang tiil, ug usa ka Loloy Remunde, 44 anyos, usa ka laborer, nakahi-agum ug samad sa iyang likod nga bahin, residente sa Purok Malinawon, Barangay Panggoy, sakop sa lungsod sa Matanao, Davao del Sur.
Nasayran nga gipamusil ang mga biktima ala 1:00 pasado ang takna sa kaganinang kaadlawon sa Purok 5, Barangay Maliit Digos, sa lungsod sa Hagonoy, Davao del Sur.
Sa pasiunang imbestigasyon sa kapolisan, nasayran nga kagabii dunay gipahigayon nga disko sa gym sa Barangay Hall sa nahisgutan nga dapit ug ang mga biktima gikan nga mitambong sa nahisgutan nga kalihukan ug pauli na kauban ang lain pang duha ka mga barkada nga sila si Eddie Boy Suya Plana, baynte anyos, ulitawo ug lakip na ang lain pang kauban nga usa ka Jerami Juana Joan, 33 anyos, menyo, nanimuyo sa Banggoy, Matanao, Davao del Sur.
Samtang nagdagan ang ilang motorsiklo, dunay lain nga motor nga dunay duha ka mga tawo nga sakay ug usa sa mga angkas niini, dunay gihulbot sa iyang hawak nga bahin.
Nakabantay ang mga kauban nga sila si Eddie Boy ug Jeramie gumikan kay sila ang anaa sa likod nga bahin hinongdan nga nanglukso, bisan kung nagdagan pa ang motor nga ilang gisakyan.
Sa pag-ambak sa duha nabati gilayon ang sunod-sunod nga mga boto sa armas.
Kini ang hinongdan nga sila si Ralp ug Loloy ang naigo.
Si Loloy ang naigo sa buko-buko nga bahin, samtang si Ralp sa wala nga tiil, gumikan kay nahitabo pa ang ginukdanay ang mga suspek nakahimo sa pagrapido sa ilang .45 pistol ngadto sa mga biktima apan ang duha lamang ang nangaigo.
Gikahulagway ang mga suspek nga nagsul-ob ug kalo ug naka-jacket ug kolor itom ang ilang motorsiklo. Mihimo gilayon ug dugang imbestigasyon ang kapolisan sa Hagonoy, Davao del Sur.
Sa crime scene na-recover sa kapolisan ang mokabat ngadto sa unom ka mga basyo sa .45 calibre nga armas.
Gisuta pa ang motibo sa nahisgutan nga pagpamusil.
