Nagtanyag ang Ukraine sa Russia og temporaryong ceasefire alang sa mga sibilyang target sa Black Sea human midaghan ang pag-atake sa mga barko ug pantalan nga gigamit sa pag-export sa agricultural products.
Gipaagi sa Kyiv ang maong proposal sa usa ka third party ug naghulat pa kini sa tubag gikan sa Moscow.
Nagbinahigay og akusasyon ang Russia ug Ukraine sa pag-atake sa mga barko nga gigamit sa ilang tagsa-tagsa ka exports.
Tungod sa seguridad, adunay mga shipping companies nga naglikay na sa pag-agi sa Odesa, usa sa importanteng sentro sa grain exports sa Ukraine.
Sa laing bahin, napugos ang Russia nga suspindihon ang operasyon sa tulo ka terminal sa Black Sea port sa Novorossiysk human sa giingong pag-atake sa Ukraine nga posibleng makaapekto sa grain exports sa Russia.
Hinuon, matud ni Russian Deputy Foreign Minister Alexander Grushko, wala pa sila makadawat og pormal nga hangyo gikan sa Ukraine alang sa ceasefire sa Black Sea.
