Gipahunong sa Estados Unidos ang mga pag-atake niini batok sa Iran human sa giingong hangyo gikan sa gobyerno sa maong nasud, sumala ni U.S. President Donald Trump. Sumala pa kang Trump, nga misulti sa mga tigbalita samtang sakay sa Air Force One, maayong paagi ang paggamit sa Iran sa paghangyo nga undangon ang mga opensiba ug nagpahayag usab kini og kahimtang nga andam makigpulong.
Dugang pa niini, giingon sa U.S. President nga andam silang mobalik sa militar nga aksyon kon mapakyas ang duha ka kampo sa pagkab-ot og bag-ong kasabutan alang sa ceasefire o paghunong sa panagsangka. Samtang, gilimod sa Iran ang pahayag ni Trump pinaagi sa tigpamaba sa Ministry of Foreign Affairs nga si Esmaeil Baghaei. Matud pa ni Baghaei, wala’y kasamtangang negosasyon nga nagpadayon tali sa Iran ug Estados Unidos, supak sa giingon ni Trump nga gihunong ang mga pag-atake aron hatagan og higayon ang mga panaghisgot alang sa kasabutan sa ceasefire.
Lakip sa gibutyag sa opisyal sa Iran nga dili nila tugotan ang Estados Unidos nga maoy magbuot sa oras o direksiyon sa gubat ug kalinaw tali sa duha ka nasud. Sa kasamtangan, nagpadayon ang taas nga tensyon tali sa Estados Unidos ug Iran, samtang wala pa’y opisyal nga kasabutan nga nagpalig-on sa posibilidad sa usa ka malungtarong ceasefire. Kahinumduman, misamot ang tensyon tali sa duha ka nasud human sa nagkasunod nga mga opensibang militar ug mga insidente sa Middle East, nga nakahatag usab og kabalaka sa internasyonal nga komunidad tungod sa posibleng pagsamot sa panagbangi sa rehiyon.
