Gipadayag sa 39th Infantry Battalion, Philippine Army nga gisurrender na ang tulo ka mga armas sa tribung Blaan nga nag-viral sa social media nga nagbaklay sa kalsada nga bitbit ang ilang mga armas sa boundary sa Kiblawan, Davao del Sur ug Tampakan, South Cotabato.
Matud pa nga pinaagi sa pagtinabangay sa 39th Infantry Battalion, Davao del Sur Police Provincial Office, ug local government unit sa Kiblawan, Davao del Sur, gi-surrender ang usa ka Ultimax 100 rifle Caliber 5.56mm, usa ka homemade M14 rifle ug usa ka homemade shotgun.
Una na nga nag-viral sa social media ang video nga nagbaklay ang pipila ka mga armadong indibidwal nga giingong mga New People’s Army kon NPA, apan giklaro kini sa 39th Infantry Battalion nga sila dili mga NPA apan sakop sa tribung Blaan.
Gibarugan karon sa kasundaluhan nga ang ilang area of responsibility, ilabi na ang Kiblawan, nagpabiling insurgency-free ug padayon nga naanad nga suportahan ang kalinaw sa komunidad pinaagi sa pakig-alayon sa katawhan ug nagkadaiyang ahensiya sa panggamhanan.
