Gitawag ni U.S. President Donald Trump nga usa ka “significant step” ang gisugyot nga 45-adlaw nga ceasefire sa Iran, apan iyang gibutyag nga kini “dili pa igo.”
Sa pakig-istorya sa mga reporter atol sa tinuig nga White House Easter Egg Roll niadtong Domingo (oras sa Amerika), gikanayon ni Trump nga ang draft nga gipasa sa pipila ka nasud aron tapuson ang giyera usa ka importante nga lakang sa proseso sa negosasyon.
Matod niya, naghimo sila og proposal, ug kini usa ka importante nga proposal.
Usa kini ka dako nga lakang. Dili pa kini igo, apan usa kini ka dakong lakang.”Gidugang pa niya nga padayon pang gihisgutan ang mga termino ug wala pa klaro ang mahimong resulta niini.
Gibutyag usab ni Trump nga ang kasamtangang lider sa Iran “mas reasonable” kung itandi sa nangaging mga grupo nga ilang giatubang.
Sumala kaniya, mas maalamon ug dili kaayo lisod ang kasamtangang mga lider niini.
Nahibal-an nga ang ceasefire proposal gipadala ngadto sa Estados Unidos ug Iran niadtong Domingo sa gabii, ug giisip kini nga katapusang higayon aron malikayan ang posibleng lapad nga pag-atake sa mga planta sa kuryente ug uban pang imprastraktura sa Iran nga gihulga ni Trump kon magpabiling sirado ang Strait of Hormuz.
Una niini, gibutyag ni Iranian Foreign Ministry spokesperson Esmaeil Baghaei nga aduna na silay tubag kabahin sa temporaryong ceasefire, apan matod niya dili kini uyon sa ilahang nasudnong interes.
