Naglunsad og kampanya ang administrasyon ni U.S. President Donald Trump aron i-separate ug pahuyangon ang International Criminal Court (ICC) tungod sa giingong hulga sa soberanya sa Estados Unidos.
Sumala sa mga taho, gipahayag ni US Secretary of State Marco Rubio nga gisalikway sa United States of America ang gahum sa ICC sa pag-imbestiga o pagpasaka og kaso batok sa mga lungsoranon ug opisyal sa Amerika.
Matud ni Rubio, ang unang tumong sa ICC mao ang paghusay sa grabe nga mga paglapas sa balaod, apan giingon niya nga nahimo na kining mas radikal ug hilabihan, maong dili tugotan sa Trump administration nga hulgaon sa korte ang mga opisyal sa Estados Unidos.
Gibalik usab ni Trump ug sa uban pang opisyal, lakip si kanhi President George W. Bush, ang ilang dugay nang posisyon nga walay awtoridad o jurisdiction ang ICC sa pag-imbestiga ug pagpasaka og kaso batok sa mga Amerikano, ilabina sa mga miyembro sa militar.
Dugang pa sa usa ka opisyal sa State Department, lakip sa gikonsiderar nga mga lakang batok sa ICC ang pagpatuman og travel bans, pagbawi sa visa, pagpahugot sa sanctions batok sa korte ug mga kaalyadong organisasyon, lakip na ang pag aghat sa ubang mga nasud pinaagi sa diplomasya aron mobiya sa maong international tribunal.
Samtang, nagkanayon si ICC spokesperson Oriane Maillet nga dili pa mokomento ang korte kabahin sa maong isyu.
