DAVAO CITY – Gipasalig sa hepe sa Talomo PNP nga si Major Noel Villahermosa nga walay lugar sa ilang Area of Responsibility (AOR) ang mga tawo nga nalambigit sa bisan unsa man nga kriminalidad.
Kahinumduman nga una ng nasikop sa iyang mga personahe ang giilang top 4 most wanted sa dakbayan atol sa ilang gilusad nga operasyon sa Matina Crossing.
Giila sa Talomo Police ang suspek nga si JERVY ALTAMERO ACIERTO, 35-anyos, construction worker, residente sa Matina Pangi ning dakbayan.
Gisikop ang nahisgutan sa otoridad pinasikad sa gipagulang warrant of arrest sa korte gumikan sa kasong Child Abuse nga gikalambigitan sa suspek ingon man duruha ka ihap sa kasong Acts of Lasciviousness.
Gitataw ni Villahermosa nga bisan makadagan ang mga suspek apan dili kini makatago ilabi na nga aduna silay mga tracking team nga mangita sa mga nahisgutan nga musikop kanila.
Nanawagan sab ang Talomo PNP sa katawhan ilabi na sa ilang AOR nga padayon lamang nga makiglambigit sa ilang buhatan sa higayon nga adunay masayran nga mga indibidwal nga nalambigit sa nagkadaiyang krimen.
